وه‌زیری رۆشنبیری دامه‌زراندی شاری راگه‌یاندنی راگه‌یاند

 

 ـ ئه‌مڕۆ كاتژمێر 00/10 ی سه‌رله‌به‌یانی ، وه‌زیری رۆشنبیری حكومه‌تی هه‌رێمی كوردستان ، بونیادنانی پڕۆژه‌ی شاری راگه‌یاندنی ، له‌شاری هه‌وڵێر راگه‌یاند.
وه‌زیری رۆشنبیری كه‌له‌به‌رده‌م رۆژنامه‌نووسان ، ئه‌م هه‌واڵه‌ی راگه‌یاندن گوتی:"له‌ ره‌وشی ئازادی رۆژنامه‌گه‌ری راگه‌یاندا كه‌ ئه‌مڕۆ كوردستان به‌خۆیه‌وه‌ ده‌بینێ ، ئه‌م پڕۆژه‌یه‌ داده‌مه‌زرێ."
هه‌روه‌ها وه‌زیری رۆشنبیر ی گوتی :" شاری راگه‌یاندن كه‌له‌سه‌ر رووبه‌ری 100 دۆنم دێته‌ دامه‌زراندن ، سه‌ره‌تا پێویستی ده‌ركردنی چه‌ند یاسایه‌ك هه‌یه‌ ، وه‌ك یاسای ئازادی راگه‌یاندن و یاسای وه‌به‌رهێنان و یاسای پاراستنی مافی بڵاوكردنه‌وه‌."
سه‌باره‌ت له‌ ئامانجی دروستكردنی ئه‌م شاره‌ به‌رێز وه‌زیری رۆشنبیری گوتی :" بۆ كۆكردنه‌وه‌ی توناكان و دابینكردنی ره‌وشێكی له‌بار بۆكاری راگه‌یاندن و دانانی باره‌گای ته‌له‌فزیۆن و رادیۆكان ، ئه‌مڕۆ له‌ عێراق نزیكه‌ی 22تا 23 كه‌ناڵی ئاسمانی هه‌یه‌ ، كه‌زۆربه‌یان له‌ ده‌ره‌وه‌ی عێراق بۆ ناو عێراق په‌خش ده‌نێرن، ئه‌گه‌ر ئێمه‌ بتوانین شارێكی ئاوامان هه‌بێ، ده‌توانیین، بۆ مه‌به‌ستی ستدیۆیی ته‌له‌فزیۆنی و رادیۆكان و ئاژانسه‌كانیش به‌كاربهێنرێت، بۆ ئه‌وه‌ كه‌ناڵانه‌ش هه‌رزان ده‌كه‌وێ."
سامی شۆڕشی وه‌زیری رۆشنبیری سه‌باره‌ت به‌ پێداویستیه‌كانی ئه‌م پڕۆژه‌یه‌ گوتی :" ئه‌و پڕۆژه‌یه‌ پێویستی به‌ستافێك له‌ كادیر هه‌یه‌، به‌تایبه‌تی كه‌ له‌م شاره‌دا نوێترین ته‌كنه‌ڵۆژیای سه‌رده‌م به‌كاردێت."
وه‌زیری رۆشنبیری سوده‌كانی ئه‌م پڕۆژه‌یه‌ له‌ به‌رفراوانكردنی ئازادی كوردستان و ناساندنی ئه‌و ئازادییه‌ به‌ دونیای ده‌ره‌وه‌ و له‌وێشه‌وه‌ هاندان بۆ وه‌به‌رهێنانی سه‌رمایه‌ی بیانی بۆ كوردسان ، روونكرده‌وه‌، هه‌روه‌ها ئه‌وه‌شی روونكرده‌وه‌ كه‌ ئه‌م پڕۆژه‌یه‌ فاكته‌رێك ده‌بێ بۆ دروستكردنی كادیر له‌ كوردستان.
له‌ كۆتاییدا وه‌زیری رۆشنیری گوتی :" ئێستا خه‌ریكین لیژنه‌یه‌ك به‌سه‌رپه‌رشتی وه‌زاره‌ت بۆ لێكۆڵینه‌وه‌ له‌ باره‌ی پێداویستیه‌كانی ئه‌و پڕۆژه‌یه‌ دروست بكه‌ین ، واتر ئه‌و لیژنه‌یه‌ سه‌ردانی چه‌ند وڵاتێك ده‌كات كه‌ ئه‌و نموونه‌یان تێدا دروستكراوه‌، ئینجا له‌گه‌لًَ كۆمپانیایه‌ك رێكده‌كه‌وین ، بۆئه‌وه‌ی ئه‌و شاره‌مان بۆ دروست بكات."