هه‌ولێر..فێستیڤاڵی یه‌ڵماز گۆنای ده‌ستیپێكرد

19:25   10/09/2006    
PUKmedia هه‌ولێر:
به‌بۆنه‌ی ساڵیادی كۆچی دوایی یه‌ڵماز گۆنای هونه‌رمه‌ندی گه‌وره‌ی سینه‌ماكاری كورده‌وه‌، سه‌رله‌به‌یانی رۆژی یه‌كشه‌ممه‌ 10/9 فێستیڤاڵی یه‌ڵماز گۆنای ده‌ستیپێكرد.
له‌و فێستیڤاڵه‌دا كه‌ له‌هۆڵی یه‌ڵماز گۆنای له‌وه‌زاره‌تی رۆشنبیری به‌ڕێوه‌چوو و تا 12/9 به‌رده‌وام ده‌بێت، ژماره‌یه‌كی به‌رچاو له‌سینه‌ماكاران و هونه‌رمه‌ندان و هونه‌ردۆستان ئاماده‌یبوون و له‌رێوڕه‌سمی كردنه‌وه‌ی فێستیڤاڵدا فه‌رزند كه‌ریم به‌ڕێوه‌به‌ری سینه‌ما له‌وه‌زاره‌تی رۆشنبیری له‌وته‌یه‌كدا ئاماژه‌یكرد به‌رۆڵ و بایه‌خی سینه‌ما له‌ناساندنی گه‌لاندا، وتیشی: سینه‌ما وه‌ك ئامرازێك ده‌توانرێت له‌رێگایه‌وه‌ گوزارشت له‌ناخی كۆمه‌ڵگای پێبكرێت و مافه‌ سیاسی و مه‌ده‌نییه‌كانی پێ ده‌سته‌به‌ر بكرێت.
له‌به‌شێكی تری قسه‌كانیدا به‌ڕێوه‌به‌ری سینه‌ما له‌وه‌زاره‌تی رۆشنبیری هه‌وڵه‌كانی یه‌ڵماز گۆنای به‌رزنرخاندو له‌و باره‌یه‌وه‌ وتی: هونه‌رمه‌ندی گه‌وره‌ی گه‌له‌كه‌مان یه‌ڵماز گۆنای به‌درێژایی ژیانی هه‌وڵه‌كانی چڕكردبووه‌وه‌ بۆ ئاشناكردنی میلله‌تی كورد به‌میلله‌تانی جیهان له‌رێگای هونه‌ری سینه‌ماوه‌.
جێی ئاماژه‌یه‌ فێستیڤاڵه‌كه‌ به‌نمایشكردنی فیلمێكی دۆكیۆمێنتاری له‌سه‌ر ژیان و به‌رهه‌مه‌كانی یه‌ڵماز گۆنای ده‌ستیپێكرد و بڕیاریشه‌ له‌ماوه‌ی 3 رۆژی فێستیڤاڵه‌كه‌دا هه‌ڵسه‌نگاندنێكی ورد له‌سه‌ر به‌رهه‌مه‌كانی یه‌ڵماز گۆنای له‌لایه‌ن سینه‌ماكاران و ده‌رهێنه‌رانی كورده‌وه‌ بكرێت.