هه

PNA- له‌ درێژه‌ی كارو چاڵاكییه‌ رۆشنبیریه‌كان بنكه‌ی كاوه‌ی رۆشنبیری كوردی كاتژمێر 3:30 ی رۆژی دووشه‌ممه‌ 5/12/2005 ، ئێواره‌ كۆرِێكی له‌ ژێر ناوی (ئاورِدانه‌وه‌یه‌ك له‌سه‌ر هونه‌ری كوردی .. ئه‌زموونم وه‌ك نموونه‌) بۆ هونه‌رمه‌ندی كوردستانی باكور خاتوو (جانێ) ، له‌ باره‌گای بنكه‌ی كاوه‌ گێرِا .
له‌م كۆرِه‌دا خاتوو جانێ باسی له‌ ژیانی خۆی له‌ مناڵیه‌وه‌ كرد ، به‌ تایبه‌تی ژیانی هونه‌ری و ئه‌و ناره‌حه‌تییه‌ی به‌ده‌ست حكومه‌تی وركیا بینیوویه‌تی له‌سه‌ر هه‌ڵوێسته‌ نه‌ته‌واتیه‌كه‌ی ، دواتر باسی له‌ ئاستی هونه‌ری كوردی و ئه‌زموونی خۆی وه‌ك كچه‌ گۆرانیبێژێكی كورد كرد .
جانێ به‌ درێژی باسی له‌و ناخۆشیانه‌ی كه‌ به‌ده‌ست حكومه‌تی توركیا بینیوویه‌تی كرد ، پاش ماوه‌یه‌ك زیندان كردنی دواتر ده‌درێته‌ به‌ گوله‌ وبه‌ سه‌ختی بریندار ده‌بێت ئه‌مه‌ ده‌بێته‌ هۆی ئه‌وه‌ی پێنچ نه‌شته‌رگه‌ری بۆ بكرێ .
پاشان باسی له‌ گرنگی خوێندن كرد بۆ ئه‌وه‌ی بتوانێ به‌ره‌نگاری ئه‌و هه‌ره‌شانه‌ی حكومه‌تی توركی ببێته‌وه‌ ، وه‌ك ئه‌و گوتی : "ئه‌و رێگایه‌ی كه‌من خستمه‌به‌ر بۆ خوێندن ، وتم یان مردن یان خوێندن ."
له‌ باسی هونه‌ری كوردی ، گوتی: "كلتور و زمان و هه‌ڵبه‌ست و ژیان و هونه‌ری كورد زۆر ره‌نگینه‌ ، له‌ به‌ر ئه‌وه‌ی له‌ رۆژهه‌ڵاتی ناوین ناوێكی زۆر گران هه‌یه‌ ."
دواتر باسی له‌ هونه‌ری سیاسی خۆی كرد كه‌ كاریگه‌ری هونه‌رمه‌ندی ناوداری كورد شڤان په‌روه‌ر به‌سه‌ریه‌تی .
كورته‌یه‌ك له‌ ژیانی خاتوو جانێ :
((جانێ ئیناز له‌ ساڵی 1971 له‌ ئه‌رزه‌روم له‌ دایك بووه‌ ، ماجستێری له‌ سه‌ر په‌روه‌رده‌ی ده‌نگ له‌ ئه‌سته‌نبول وه‌رگرتووه‌ ، هونه‌رمه‌ند جانێ شیعری بۆ گۆرانیه‌كانی نووسیوه‌ ، وتا ئێستا شه‌ش سیدی به‌رهه‌میه‌تی وبۆ ساڵی 2006 سیدیه‌كی نوێ له‌ لایه‌ن كۆمپانیایه‌كی فه‌ره‌نسی به‌رهه‌م دێنێت .
له‌ ساڵی 1992 له‌ سه‌ر هه‌ڵوێستی نه‌ته‌وایه‌تی له‌ لایه‌ن حكومه‌تی توركی به‌ندكراوه‌ و له‌ ساڵی 1993 له‌ سه‌ر هه‌مان هه‌ڵوێست له‌ لایه‌ن حكومه‌تی توركی دراوه‌ته‌ به‌ر گوله‌ .))
په‌سار فایق/هه‌ولێر